• Учреждение образования "Белорусский государственный университет культуры и искусств"
•  > 
• Аб універсітэце

Установа адукацыі «Беларускі дзяржаўны ўніверсітэт культуры і мастацтваў» (далей – БДУКМ, универсітэт) створаны на базе Мінскага інстытута культуры, які пачаў дзейнічаць з 1975 г. у адпаведнасці з Пастановай Савета Міністраў БССР ад 04.05.1975 №139 і загадам Міністэрства вышэйшай і сярэдняй спецыяльнай адукацыі БССР ад 14.05.1975 № 234.

Пастановай Савета Міністраў Рэспублікі Беларусь № 662 Мінскі інстытут культуры быў пераўтвораны ў Беларускі ўніверсітэт культуры. Адбылася маштабная рэарганізацыя факультэтаў і кафедраў, у выніку чаго пачалася падрыхтоўка спецыялістаў па новых спецыяльнасцях і спецыялізацыях.

Актывізаваліся міжнародныя сувязі, адкрыліся магістратура і Мазырскі філіял факультэта завочнага навучання. У 1996 г. паспяхова прайшлі атэстацыю і акрэдытацыю універсітэта, а загадам Міністэрства адукацыі Рэспублікі Беларусь ад 26.11.1999 № 703 універсітэту нададзены статус вядучай вышэйшай навучальнай установы ў нацыянальнай сістэме адукацыі ў сферы культуры.

Загадам Міністэрства культуры Рэспублікі Беларусь ад 08.10.2004 №166 установа адукацыі «Беларускі дзяржаўны ўніверсітэт культуры» была перайменавана ва ўстанову адукацыі «Беларускі дзяржаўны ўніверсітэт культуры і мастацтваў».

27 кастрычніка 2011 г. установе вышэйшай адукацыі «Беларускі дзяржаўны ўніверсітэт культуры і мастацтваў», першаму сярод ВНУ культуры, 22-у з 53 ВНУ рэспублікі, выдадзены сертыфікат адпаведнасці, які сведчыць аб тым, што сістэма менеджменту якасці праектавання і ажыццяўлення адукацыйнай дзейнасці ў галіне культуры і мастацтва, правядзення выхаваўчай работы, падрыхтоўкі навуковых кадраў вышэйшай кваліфікацыі, навукова-даследчай, інавацыйнай і міжнароднай дзейнасці адпавядае патрабаванням СТБ ISO 9001-2009 да сістэмы менеджменту якасці.

Структура ўніверсітэта складзена зыходзячы з асноўных напрамкаў яго дзейнасці і адпавядае профілю ВНУ культуры і мастацтваў. У структуру БДУКМ уваходзяць Інстытут павышэння кваліфікацыі і перападрыхтоўкі кадраў, 5 факультэтаў (факультэт культуралогіі і сацыякультурнай дзейнасці, факультэт традыцыйнай беларускай культуры і сучаснага мастацтва, факультэт музычнага мастацтва, факультэт інфармацыйна-дакументных камунікацый, факультэт завочнага навучання), 26 спецыяльных і агульнаўніверсітэцкіх кафедраў, а таксама наступныя падраздзяленні і службы: вучэбна-метадычны аддзел, аддзел прававой і кадравай работы, аддзел міжнародных сувязей, аддзел выхаваўчай работы з моладдзю, мастацкая галерэя «Універсітэт культуры», прадзюсерскі цэнтр «Арт-мажор», аспірантура, навукова-даследчы аддзел, бібліятэка, аддзел справаводства і кантролю, аддзел тэхнічных сродкаў навучання і інфармацыйных тэхналогій, аддзел рэдакцыйна-выдавецкай і паліграфічнай работы, адміністрацыйна-гаспадарчы аддзел, эксплуатацыйна-тэхнічны аддзел, падраздзяленне аховы, сталовая.

Падрыхтоўка спецыялістаў з вышэйшай адукацыяй на І ступені вышэйшай адукацыі вядзецца па 12 спецыяльнасцях, 26 напрамках спецыяльнасцей і 15 спецыялізацыях. Усяго ва ўніверсітэце навучаецца каля 4500 студэнтаў на дзённай і завочнай формах атрымання адукацыі.

Універсітэт размяшчаецца ў вучэбных карпусах – галоўны корпус (вул. Рабкораўская, 17), вучэбны корпус (вул. Маскоўская, 18), вучэбны корпус (вул. Маскоўская, 18а), вучэбны корпус (вул.Каліноўскага, 12) маюцца інтэрнаты: інтэрнат №1 (вул. Рабкораўская, 15), інтэрнат № 2 (вул. Рабкораўская, 13), інтэрнат № 3 (вул.Сурганава, 23).

Спецыяльнасці, па якіх вядзецца падрыхтоўка на І ступені вышэйшай адукацыі ў БДУКМ – «Культуралогія», «Рэжысура свят», «Сацыяльна-культурная дзейнасць» «Народная творчасць», «Харэграфічнае мастацтва», «Мастацтва эстрады», «Спевы», «Бібліятэчна-інфармацыйная дзейнасць», «Музейная справа і ахова гісторыка-культурнай спадчыны», «Мастацтвазнаўства», «Дэкаратыўна-прыкладное мастацтва», «Духавыя інструменты». Спецыяльнасці, па якіх вядзецца падрыхтоўка на ІІ ступені вышэйшай адукацыі ў БДУКМ – «Сацыяльна-культурная дзейнасць», «Культуралогія», «Мастацтвазнаўства», «Бібліятэчна-інфармацыйная дзейнасць», «Музейная справа і ахова гісторыка-культурнай спадчыны», «Арт-менеджмент».

Штат прафесарска-выкладчыцкага саставу ўніверсітэта складае больш за 350 чалавек, з якіх амаль 50% маюць вучоныя ступені і званні, ганаровыя званні.

З мэтай павышэння якасці падрыхтоўкі спецыялістаў на базе ўніверсітэта створана вучэбна-метадычнае аб’яднанне па адукацыі ў галіне культуры і мастацтваў, у склад якога ўваходзіць 8 навукова-метадычных саветаў па напрамках адукацыі і групах спецыяльнасцей. Асноўнымі функцыямі вучэбна-метадычнага аб’яднання з’яўляюцца: удзел у распрацоўцы і ўдасканальванні адукацыйных стандартаў вышэйшай адукацыі і тыпавых вучэбных планаў і праграм; экспертыза вучэбных планаў па спецыяльнасцях і вучэбных праграм па вывучаемых дысцыплінах; узгадненне рукапісаў падручнікаў, вучэбных і вучэбна-метадычных дапаможнікаў.

БДУКМ забяспечвае падрыхтоўку кадраў вышэйшай кваліфікацыі аспірантуры і дактарантуры па спецыяльнасцях: «Бібліятэказнаўства, бібліяграфазнаўства і кнігазнаўства», «Тэорыя, методыка і арганізацыя сацыяльна-культурнай дзейнасці», «Тэорыя і гісторыя мастацтваў», «Тэорыя і гісторыя культуры», «Музеязнаўства, кансервацыя і рэстаўрацыя гісторыка-культурных аб’ектаў». Ва ўніверсітэце працуюць саветы па абароне кандыдацкіх і доктарскіх дысертацый.

Калектыў універсітэта — творчая супольнасць вядучых дзеячаў нацыянальнай культуры, вядомых навукоўцаў, педагогаў, маладых прадстаўнікоў інтэлектуальных і творчых сіл нашай краіны, якая імкнецца мэтанакіравана здзяйсняць праграму фіксацыі, вывучэння, захавання і трансляцыі традыцыйнай і сучаснай беларускай культуры ў самай шырокай разнастайнасці яе праяў. Добра аснашчаныя камп’ютарныя класы, спецыялізаваныя аўдыторыі, фанатэка, багатая вучэбная электронная бібліятэка, майстэрні ганчарства, саломапляцення, габелена, ткацтва, роспісу па тканіне, лозапляцення, старадаўніх беларускіх музычных інструментаў дазваляюць якасна арганізоўваць адукацыйны працэс, пашыраць магчымасці прафесійнага росту студэнтаў, паступовага набыцця імі навуковай і творчай сталасці. Фактычна па ўсіх спецыяльнасцях створаны цыкл бесперапыннай падрыхтоўкі спецыялістаў — ад выпускніка школы, каледжа, праз ступені студэнцтва, магістратуры, аспірантуры, дактарантуры, да вышынь прафесійнага майстэрства і дасканаласці. Калектыў здольны вырашаць задачы падрыхтоўкі і выхавання адукаванай і прафесійна сталай нацыянальнай інтэлігенцыі, якая будзе ўносіць свой уклад у развіццё культуры, мастацтва і навукі Беларусі.

За перыяд існавання больш за 30 000 маладых спецыялістаў атрымалі дыпломы ўніверсітэта. Высокапрафесійны прафесарска-выкладчыцкі склад дае магчымасць універсітэту рыхтаваць спецыялістаў вышэйшай кваліфікацыі, якія спалучаюць глыбокія спецыяльныя веды з грунтоўнай гуманітарнай падрыхтоўкай. БДУКМ мае высокі рэйтынг сярод універсітэтаў Беларусі дзякуючы якаснай навуковай рабоце і інавацыйнай вучэбнай дзейнасці, шырокамаштабнай мастацкай творчасці.